Mahaparinirvan Din : डॉ. बाबासाहेब आंबेडकर महापरिनिर्वाण दिनी दादर स्थानकात मर्यादित प्रवेश, नवीन नियमावली

Dr Babasaheb Ambedkar Death Anniversary : गुरुवार ५ डिसेंबरच्या मध्यरात्रीनंतर ते ६ डिसेंबरच्या मध्यरात्री १२ पर्यंत स्थानकात प्रवेशाचे मर्यादित निर्बंध लागू राहणार आहेत.

मुंबई : डॉ. बाबासाहेब आंबेडकर यांच्या महापरिनिर्वाण दिनानिमित्त चैत्यभूमीला भेट देण्यासाठी राज्यासह देशभरातून नागरिक मोठ्या संख्येने दादर येथे येतात. यामुळे होणारी गर्दी विभागण्यासाठी मुंबई रेल्वे पोलिस आयुक्तालयाने शुक्रवारी दादर रेल्वे स्थानकात मर्यादित प्रवेश घोषित केला आहे.

गुरुवार ५ डिसेंबरच्या मध्यरात्रीनंतर ते ६ डिसेंबरच्या मध्यरात्री १२ पर्यंत स्थानकात प्रवेशाचे निर्बंध लागू राहणार आहेत. अनुयायांसह प्रवाशांच्या सुविधेसाठी प्रवासी उद्घोषणा यंत्राद्वारे माहिती देण्यात येणार आहे. रेल्वे स्थानक परिसरात अनुचित प्रकार टाळण्यासाठी पोलिसांनी दिलेल्या सूचनांचे पालन करावे, गर्दीचे स्वरूप व परिस्थिती पाहून आपत्कालीन स्थिती निर्माण होत असल्यास निर्बंध शिथिल करण्यात येतील, कोणत्याही अफवांवर विश्वास ठेवू नये, असे आवाहन मुंबई रेल्वे पोलिस आयुक्तालयाने केले आहे.

– शहरातून येणाऱ्या अनुयायी व रेल्वे प्रवाशांना येण्यासाठी स्कायवॉक खुला असणार आहे.
– लोकल आणि मेल-एक्स्प्रेस प्रवाशांना शहरात जाण्यासाठी याचा वापर करता येईल. शहरातून येणाऱ्या अनुयायी व रेल्वे प्रवाशांना येण्यासाठी हा पूल खुला असेल.

डॉ. बाबासाहेब आंबेडकर यांच्या ६८व्या महापरिनिर्वाण दिनानिमित्त बेस्टकडून विशेष सेवा

डॉ. बाबासाहेब आंबेडकर यांच्या ६८व्या महापरिनिर्वाण दिनानिमित्त बेस्ट उपक्रमाकडून ४ डिसेंबरपासून ७ डिसेंबरपर्यंत दादर रेल्वे स्थानक ते चैत्यभूमी अशी दर १५ ते २० मिनिटांनी विशेष बससेवा देण्यात येणार आहे. तर, प्रवाशांच्या सोयीसाठी तात्पुरत्या स्वरूपात दैनंदिन ६० रुपयांचा बसपासही उपलब्ध करण्यात येणार आहे.

महापरिनिर्वाणदिनी शिवाजी पार्क येथील चैत्यभूमी येथे मोठ्या संख्येने अनुयायी येतात. त्यांची गैरसोय होऊ नये यासाठी गेल्या वर्षी मुंबई परिसरातून तसेच बाहेरगावाहून येणाऱ्या प्रवाशांसाठी दादर स्थानक ते शिवाजी पार्क मैदान- चैत्यभूमी येथे जाण्याकरीता चैत्यभूमी फेरी या नावाने अतिरिक्त बस चालवण्यात आली होती. यंदाही दादर रेल्वे स्थानक येथून बस उपलब्ध असतील.

अश्या बस सेवा असतील

४ डिसेंबरला मुंबईच्या विविध भागांतून चैत्यभूमीसाठी बसमार्ग क्रमांक २००, २४१, ए-३५१ आणि ३५४ यावर बससेवा चालवण्यात येणार आहे. ६ डिसेंबरला शिवाजी पार्क येथूनही सी ३३, ए १६४, २४१, सी ३०५, ए ३५१, ३५४, ए-३५७, ए-३८५, सी-४४० आणि सी-५२१ या बसमार्गावर अतिरिक्त बसचे प्रवर्तन करण्यात येणार आहे. जेणेकरून नियमित प्रवासभाड्यात प्रवाशांना चैत्यभूमी येथे पोहोचणे शक्य होईल.

मुंबईत विविध ठिकाणी असलेल्या डॉ.बाबासाहेब आंबेडकर यांच्या स्मृतीस्थळांना भेट देऊ इच्छिणाऱ्या अनुयायांकरिताही विशेष बसफेऱ्यांचे नियोजन केले आहे. या बसही शिवाजी पार्क मैदानाजवळून उपलब्ध होतील. सकाळी साडेसात ते सकाळी १० वाजेपर्यंत या फेऱ्या सेवेत असतील.

इतरही व्यवस्था सोयी सुविधा

अनुयायांच्या मार्गदर्शनासाठीही चैत्यभूमी, शिवाजी पार्क मैदान, वीर कोतवाल उद्यान परिसरात बसवाहक आणि बस निरीक्षक यांची नियुक्ती करण्यात येईल. तसेच, बेस्टकडून मोफत वैद्यकीय तपासणी, नेत्र तपासणी, प्रथमोपचाराची व्यवस्था करण्यात आली आहे. अल्पोपाहाराचीही व्यवस्था केली आहे.